Мәжіліс депутаты Аманжол Әлтаев қарттар үйіндегі қариялар жөнінде ұсыныс білдірді, деп хабарлайды kaztoday.kz.
Шенеунік әке-шешесінің қарттар үйіндегі шығынын оларды өткізіп жіберген безбүйрек балаларға төлетуді ұсынды. Оның сөзінше, қарттар үйін паналағандардың ішінде балалары лауазымды қызмет атқаратын, кәсіппен айналысатын, ұрпақтары бақуатты тұратын кісілер де бар.
Қоғамда қартайған ата-анасына жатсына қарайтын, безбүйрек ұл мен кесірлі келін, тасжүрек немерелер көбейіп барады. Соның кесірінен қартайған кісілер бойдан қуат, білектен күш кеткен егде шағында өз баласына өгей болып, қарттар үйін паналауда. «Қарты бар үйдің қазынасы бар» деген. Құндылықтың мәнін ұқпаған жетесіз ұрпақ көбеюде. Өз баласы өзекке теуіп, өкісігі ұлғайған шерменде қарттардың барлығы асыраушы балалары жоқ, тұл адамдар емес.
Қарттар үйін паналауға мәжбүр болған қариялардың дәрі-дәрмегі тағы да басқа материалдық қажеттілігі үшін өмірдегі ең қымбаты ата-анасын керексіз қылған көкек балалардың табысынан ұстап отыруды ұсынамын, деді депутат.
