Арнайы операция Келес, Төлеби аудандарында және Түркістан қаласында жүргізілді.
Прокуратураның хабарлауынша, жедел-іздестіру іс-шаралары суррогат алкоголь өнімдерін дайындап, нарыққа өткізумен айналысқан адамдар тобына қатысты ұйымдастырылды. Құқық қорғау органдарының әрекеті нәтижесінде жалпы саны 31 920 бөтелке жалған алкоголь өнімдері тәркіленді. Оның ішінде:
- «Абсолют» маркасы – 12 280 бөтелке,
- «Skyy» маркасы – 11 020 бөтелке,
- «Айдабульская» маркасы – 8 620 бөтелке.
Сонымен қатар, 600 литр спиртті сұйықтық табылып, барлығы тәркіленді. Заңсыз өнімнің жалпы нарықтық құны 170 миллион теңгеден асады.
Аталған факті бойынша ҚР Қылмыстық кодексінің 233-бабымен тергеу амалдары басталды. Қазіргі уақытта құқық қорғау органдары кінәлілерді анықтап, жауапқа тарту бойынша жұмыстар жүргізіп жатыр.
Прокуратура халықты сақ болуға және заңсыз алкоголь өнімдерін тұтынудан бас тартуға шақырады. Заңсыз өнім денсаулыққа зиян тигізіп қана қоймай, ауыр салдарға әкелуі мүмкін екендігі ескертілді.
