Алматы облысында Іле-Алатау мемлекеттік ұлттық табиғи паркінің аумағында қайғылы оқиға болды. 22 маусым күні Маралсай шатқалында демалып жүрген анасы мен оның 10 жастағы баласы суға батып кетті, деп хабарлайды Kaztoday.kz.
Алдын ала ақпаратқа сәйкес, бала суға абайсызда құлап кеткеннен кейін анасы оны құтқаруға тырысқан. Алайда, ол мүмкін болмаған. Қайғылы жайт туристік аумақта күндізгі уақытта болған.
«1981 жылы туған әйел 2015 жылы туған ұлымен демалысқа келген. Саябақ аумағында жүргенде бала суға түсіп кеткен, анасы артынан секіріп, екеуін де ағыс алып кеткен. 22 маусым күні сағат 18:35-те анасының денесі судан табылды. Баланы іздеу жұмыстары жалғасып жатыр», – делінген құтқарушылардың хабарламасында.
Қазіргі таңда іздестіру-құтқару операциясына 110 адам мен 20-дан астам техника жұмылдырылған. Олардың қатарында ұлттық парк қызметкерлері, жергілікті атқарушы органдар, «Lider.kz» еріктілер қозғалысы мен басқа да еріктілер бар.
Іздеу жұмыстары Талғар өзенінің бойымен жалғасуда. Құтқарушылар мен еріктілер өзен жағалауын тексеріп, арнайы құрал-жабдықтардың көмегімен баланы іздестіруде.
Оқиғаға байланысты тиісті органдар тергеу жұмыстарын бастады. Мамандар азаматтарды таулы және суы қатты ағысты аймақтарда демалу кезінде қауіпсіздік талаптарын сақтауға шақырады.
