Бүгінгі Мәжіліс отырысында депутат Ардақ Назаровтың әрекеті қоғамда түрлі пікір тудырды. Халық қалаулысы мінберге шыға сала, алдымен Нарынқолдың картошкасын жарнамалап, артынша анасын туған күнімен құттықтап, ізгі тілегін білдірді. Осыдан кейін ғана ресми депутаттық сауалын жолдады.
Бұл қадам сырттай қарағанда қарапайым ғана ізгі ниет секілді көрінуі мүмкін. Дегенмен, мәселе – Парламент мінберінің мәртебесінде. Заң шығарушы орган – халықтың мүддесін қорғап, мемлекеттік деңгейдегі маңызды мәселелер талқыланатын ең жоғары саяси алаң. Мұнда жеке құттықтаулар мен отбасылық мейрамдарға орын бар ма?
Депутаттың бұл әрекеті қоғамда «Мәжіліс мінбері шоу бағдарламаның сахнасына айналып бара жатыр ма?» деген сұрақ туғызды. Расында да, егер әр халық қалаулысы ресми жиында туған күн, мерейтой немесе әнге тапсырыс бере бастаса, заң шығарушы органның абыройы қайда қалады?
Парламенттің басты миссиясы – халықтың тағдырын шешетін заңдарды талқылау, ел дамуына қажет шешімдерді қабылдау. Сондықтан әрбір депутат ресми мінберді жеке пиар немесе отбасылық құттықтаулар үшін емес, қоғамның түйткілді мәселелерін шешуге арнағаны жөн.
Бұл оқиға – бір ғана адамның әрекеті емес, мемлекеттік органдағы мәдениеттің айнасы. Халықтың сенімін ақтау үшін Мәжіліс сахна емес, салмақты саяси институт екенін іс жүзінде дәлелдеу қажет.
