Маңғыстау облысында сот үкімімен қызды еркінен тыс көлікке отырғызып, алып кеткен бес азамат кінәлі деп танылып, әрқайсысы үш жылға бас бостандығынан айырылды.
Оқиға 2025 жылдың 16 желтоқсанына қараған түні болған. Үйіне кіріп бара жатқан бойжеткенді белгісіз адамдар күштеп көлікке салып, алып кеткені анықталған.
Сотта іс «адам ұрлау» және «некеге мәжбүрлеу» баптары бойынша қаралып, үкім заңды күшіне енді.
Айта кетейік, өткен жылы Қылмыстық кодекске енгізілген өзгерістерге сәйкес, некеге мәжбүрлеу қылмысы үшін 10 жылға дейін жаза көзделген. Соған қарамастан, мұндай құқық бұзушылықтар әлі де тіркеліп келеді.
2026 жылдың ақпанында Маңғыстау облысының Мұнайлы ауданында екі азамат дәл осындай қылмыс үшін 3 жылға сотталды.
2025 жылдың қазанында Тараз қаласында бірнеше жігіт қызды аялдамада күштеп көлікке отырғызып әкеткен, кейін үш күдікті қолға түсті.
2024 жылдың сәуірінде Шымкентте әлеуметтік желі арқылы танысқан қызды алып қашуға әрекеттенген Жаңаөзен тұрғынына 4 жыл шартты жаза тағайындалған.
Мемлекет басшысы Қасым-Жомарт Тоқаев биыл қаңтарда қыз алып қашуды адам ұрлау ретінде бағалап, мұндай әрекеттерді “жабайылық” деп атап, оған жол берілмеуі тиіс екенін қатаң ескерткен.
