Қызылордада «AMANAT» партиясының бастамасымен қолға алынған «AMANAT:TULGALAR» атты жаңа жоба аясында алғашқы тағылымды кездесу ұйымдастырылды. Жобаның алғашқы қонағы – ел дамуына сүбелі үлес қосқан қоғам қайраткері, партия ардагері Сайлаубай Әбішұлы болды.
Іс-шара партияның «Ардагерлерді ардақтайық» жобасы шеңберінде өткізіліп, аға буын өкілдерінің өмірлік жолын жастарға үлгі ету, еңбек тәжірибесін кеңінен насихаттау мақсатында ұйымдастырылды. Кездесу барысында Сайлаубай Әбішұлының саналы ғұмыры, елге сіңірген еңбегі, түрлі саладағы қызмет жолы туралы мазмұнды әңгіме өрбіді.
Жиынға қатысушылар ардагерге өз сауалдарын қойып, елдік мәселелер, еңбек адамының қадірі, ұрпақ тәрбиесі мен қоғамдық жауапкершілік төңірегінде пікір алмасты. Кездесу ашық форматта өтіп, қатысушылар тарапынан үлкен қызығушылық тудырды.
Сайлаубай Әбішұлы 1946 жылы Қызылорда облысы Арал ауданында дүниеге келген. Еңбек жолын ұстаздық қызметтен бастаған ол кейін комсомол, партия органдары, ауыл шаруашылығы, мәдениет салалары мен мемлекеттік қызметте жауапты лауазымдар атқарған. Ұзақ жылдар бойы өңірдің әлеуметтік-экономикалық дамуына, қоғамдық-саяси өмірінің жандануына белсенді үлес қосып, ел игілігі жолында аянбай еңбек етті.
Бүгінде де қоғамдық кеңестер аясында белсенді жұмыс жүргізіп, жастарға ақыл-кеңесін айтып, тәлімгерлік бағытта қызмет етіп келеді. Ол – Қызылорда қаласы мен Арал ауданының Құрметті азаматы. Сонымен қатар, Қазақстан Республикасының ауыл шаруашылығы саласының «Құрметті ардагері», «Қазақстан Республикасына еңбегі сіңген ардагері», «Қазақстан Республикасының Алтын жұлдызы» төсбелгісінің иегері.
Биыл ардақты азаматтың 80 жылдық мерейтойы облыс көлемінде кең көлемде аталып өтуде. Кездесу барысында мерейтой иесіне құрмет көрсетіліп, «AMANAT» партиясы Атқарушы хатшысының арнайы құттықтауы табысталды.
Ұйымдастырушылардың айтуынша, «AMANAT:TULGALAR» жобасы түрлі салада табысқа жеткен тұлғалардың, оның ішінде партия мүшелерінің өмір жолын, кәсіби тәжірибесін және ел дамуына қосқан үлесін кеңінен танытуға бағытталған.
Жоба алдағы уақытта тоқсан сайын тұрақты түрде өткізіліп, ұрпақтар сабақтастығын нығайтуға, ұлттық құндылықтарды дәріптеуге және өмірлік тәжірибені жас буынға жеткізуге арналған маңызды алаңға айналмақ.
