Алматы прокуратурасы «Дикий Арман» деген лақап атпен танымал Арман Жұмагелдиев пен тағы 40 шақты адамның сотынан әлеуметтік желіге тараған деректерге байланысты тергеудің басталғанын жеткізді, деп хабарлайды Kaztoday. kz.
Алматы прокуратурасының сотқа дейінгі тергеу басқармасы істі Қылмыстық кодекстің «Сотқа дейінгі істің немесе жабық сот талқылауының деректерiн жария ету» бабы бойынша қарап жатқандығы белгілі болды.
Прокуратура сотқа дейінгі тергеу деректері жария етуге жатпайтынын айтуда. Бұл қылмыстық іс бойынша қанша адам күдікке ілінгені әзірге белгісіз .
Естеріңізге сала кетейік, 14 желтоқсан күні YouTube желісінде «Арман Джумагельдиев» деген арна ашылып, жабық сот процесінен видеолар шыға бастаған болатын. Онда “Қаңтар оқиғасы” бойынша істе айыпталушылардың бірі, ҰҚК-нің бесінші департаментінің экс-басшысы Руслан Ысқақовтың да видеосы бар. Бұған дейін ол Қаңтар оқиғасы кезінде өзіне бұйрықты Самат Әбіш бергенін айтқан еді.
