ҚР Денсаулық сақтау министрлігі Медициналық және фармацевтикалық бақылау комитетінің Қызылорда облысы бойынша департаментінің басшысы Жанерке Жақсылықтың айтуынша, өңірде медициналық қызметтің сапасы мен қауіпсіздігін қамтамасыз ету бағытындағы жұмыстар жүйелі жүргізілуде.
Бүгінде Қызылорда облысында 975 медициналық ұйым мен 536 фармацевтикалық нысан халыққа қызмет көрсетуде. Жылдың алғашқы алты айында 4 290 мемлекеттік қызмет көрсетіліп, салаға қатысты 340 арыз-шағым қаралған. Заң бұзушылықтар анықталған ұйымдарға тиісті әкімшілік шаралар қабылданған.
Медициналық және фармацевтикалық қызмет сапасын арттыру мақсатында 81 субъектіге профилактикалық бақылау жүргізіліп, 79 ұсыным берілді. Алайда олардың 43-і талаптарды толық орындамағандықтан, келесі бақылау кезеңінің тізіміне енгізілген.
«Халықтың сапалы әрі қауіпсіз медициналық көмекке қол жеткізуі – біздің басты міндетіміз. Бұл бағыттағы бақылау жұмыстары тұрғындардың құқықтарын қорғауға және медициналық ұйымдардың жауапкершілігін арттыруға бағытталған», – деді Жанерке Жақсылық.
Сапалы медицина – халық денсаулығының ғана емес, қоғам сенімінің де кепілі. Сондықтан саладағы талап пен бақылаудың күшеюі – әрбір тұрғынның қауіпсіздігі мен құқығын қорғаудың маңызды тетігі болып қала бермек.
