Шығыс Қазақстан облысында қызмет орнын рұқсатсыз тастап кеткен мерзімді әскери қызметші табылды. Алдын ала ақпарат бойынша, сарбаздың мұндай шешім қабылдауына туған үйіне деген сағынышы себеп болған.
ҚР Қарулы Күштері Әскери полициясы бас басқармасының хабарлауынша, Өскемен гарнизонына қарасты әскери бөлімдердің бірінде борышын өтеп жүрген қатардағы жауынгер А.Е. Мархан облыс орталығынан 20 шақырымдай қашықтықта анықталған. Кейін ол әскери полиция бөліміне жеткізілді. Сарбаздың өмірі мен денсаулығына қауіп төніп тұрған жоқ.
Қазіргі уақытта аталған жағдайға байланысты қызметтік тексеру басталды. Мамандар әскери қызметшінің бөлімнен кетуіне не түрткі болғанын және оқиғаның басқа да мән-жайларын анықтап жатыр.
Алдын ала деректерге сүйенсек, сарбаз қызмет орнын үйін сағынғандықтан тастап кеткен. Тексеру кезінде ол командирлері немесе бірге қызмет атқаратын әскери қызметшілер тарапынан жарғы талаптарына қайшы әрекеттер мен қызметтік өкілеттікті асыра пайдалану жағдайлары болмағанын айтқан.
2004 жылы туған мерзімді әскери қызметші 23 шілде күні шамамен сағат 06:30-да әскери бөлім аумағынан кеткен. Сол уақытта ол тәуліктік кезекшілік құрамында болып, зымыран-артиллериялық қару-жарақ қоймасында күндізгі кезекшінің міндетін атқарған. Әскери бөлімнен шыққан кезде оның қолында қару болмаған.
Жауынгерді іздеуге әскери полиция мен ішкі істер органдарының қызметкерлері жұмылдырылды. Бірлескен іздестіру нәтижесінде сарбаз табылды. Қазір құзырлы органдар оқиғаның себептері мен барлық мән-жайын тексеріп жатыр.
