Ташкент қаласында 86 жастағы әйелдің бірнеше күн бойы өз үйінен шыға алмай қалғаны туралы ақпарат тарады. Оқиғаға байланысты қылмыстық іс қозғалып, тиісті органдар тексеру жүргізіп жатыр.
Әлеуметтік желілерде Мырза Ұлықбек ауданында тұратын кейуананың пәтерінде қамалып қалғаны туралы бейне жарияланған. Мәліметке сәйкес, есікті арнайы шебер ашқаннан кейін әйел бірнеше күннен бері тамақ ішпегенін айтқан.
Оқиғаны тексеру барысында кейуананың пәтері 2025 жылы сатып алу-сату шарты негізінде басқа адамның атына рәсімделгені анықталған.
Бас прокуратура аталған жағдайға байланысты тексеру жүргізіп, егде жастағы әйелдің алаяқтық құрбаны болуы мүмкін екенін мәлімдеді. Осы дерек бойынша қылмыстық іс қозғалды.
Қазіргі уақытта жағдай Әлеуметтік қорғау ұлттық агенттігінің бақылауына алынған. Кейуанаға қажетті әлеуметтік және басқа да көмек көрсетіліп жатыр.
Оқиғаның мән-жайы тергеу барысында анықталады.
