Әлеуметтік желідегі сынға байланысты Әділет Зейнілдің жұбайы мәлімдеме жасады

Әділет Зейнілдің қазіргі жары Жұлдыз Мырзәлі әлеуметтік желілерде өзіне және жұбайына қатысты таралып жатқан пікірлерге байланысты алғаш рет пікір білдірді. Оның айтуынша, отбасы ықтимал сот процесіне дайындалып, интернетте жарияланған материалдарды жинақтап жатыр.
Жұлдыз Мырзәлі әлеуметтік желілердегі жазбалар, пікірлер, скриншоттар мен бейнематериалдардың барлығы тіркеліп жатқанын айтты. Оның сөзінше, бұл деректер алдағы уақытта сотта дәлел ретінде ұсынылуы мүмкін.
Ол үнсіз қалуының себебін де түсіндіріп, мұның ешқандай кінәні мойындаумен немесе жауап беруге уәждің жоқтығымен байланысты емес екенін жеткізді. Керісінше, қазіргі уақытта заң аясында қажетті дәлелдерді жинауға басымдық беріліп жатқанын мәлімдеді.
Сонымен қатар, Жұлдыз Мырзәлі анонимді парақшалар арқылы жалған ақпарат тарататындарға ескерту жасады. Оның айтуынша, жалған аккаунттарды пайдалану жауапкершіліктен құтқармайды және әрбір адам жариялаған сөзі мен әрекеті үшін заң алдында жауап береді.
Сөз соңында ол отбасының енді нақты әрекетке көшкенін айтып, барлық құқықтық мәселелер заң аясында қаралатынын жеткізді.