Астанада интернет арқылы есірткі саудалаған деген күдікпен бес ер адам ұсталды. Олар марихуана мен гашиштен бөлек, каннабис шайыры қосылған печенье де сатқан.
Полиция мен Мемлекеттік күзет қызметі бірлесіп жүргізген арнайы операция барысында «Пепе» интернет-дүкені арқылы жұмыс істеген заңсыз сауда желісі анықталды.
Тергеу мәліметінше, күдіктілердің әрқайсысы есірткіні сату, қаптау, сақтау және жасырын орындарға орналастыру міндеттерін атқарған. Интернет-дүкен тәулік бойы жұмыс істеген.
Тінту кезінде әрқайсысының салмағы шамамен 100 грамм болатын 238 печенье және 12 келіге жуық есірткі тәркіленді. Оның ішінде 8 келіден астам марихуана, 1,5 келі гашиш және 2 келі каннабис шайыры бар.
Арнайы операция кезінде жалдамалы пәтерлерден жасы 30-дан асқан бес күдікті бір мезгілде ұсталды.
