Қаңтар оқиғасында ажал құшқан азаматтарға арнап ас берілді, деп хабарлайды kaztoday.kz.
Бүгін Тараз өңірінде 2022 жылы Қаңтар оқиғасы кезінде мерт болған адамдардың туыстары марқұмдарға арнап ас берді. Оған Алматы, Талдықорған, Тараз, Шымкент және Қызылорда қалаларында оқиға кезінде қаза болған азаматтардың туыстары мен азаматтық белсенділер қатысты.
Жиынға келген отыздан аса адам алдымен Тараздағы орталық мешітке барып, марқұмдардың рухына бағыштап құран оқытты. Олар Қаңтар оқиғасында опат болғандар ұмытылмауы керек деп санайды.
«Сол кезде үйден ойнап-күліп шыққан балаларымыздың денесі қас-қағым сәтте келіп жатты. Бұл бар отбасының қабырғасын қайыстырды», «Біз барда, көзі ашық, көкірегі ояу ұрпақ барда Қаңтар оқиғасында қаза тапқандар ұмытылмайды», «Қаңтар оқиғасында қаза болғандарға арнайы статус берілсін!», «Марқұмдардың артында қалған отбасы қараусыз қалмасын!»
деп пікір білдірді асқа келген ата-аналар. Олардың пікіріне белсенділер де қосылып жатты.
