Гинеколог Маржан Сағымбекова шаш қидырып, кірпік жапсыратын әйелдерден ауру бала туатынын айтты, деп хабарлайды kaztoday.kz.
Тараздық гинеколог дәрігер, салада 45 жылдық тәжірибесі бар Маржан Сағымбекова жүктілікті жоспарлап жүрген қыз-келіншектерге кеңес берді.
«Кеңес заманында жүкті әйелдерге шашын кесуге, боянуға, тырнақ жасатуға рұқсат бермейтін. Жуынбай, кір-қожалақ болып жүр деп отырған жоқпын. Ал, қазір келіншектер перзентханаға барарда боянатыны соншалық, театрға барғандай келеді. Бірақ оның бәрі — химия. Қазір сән салонында жүкті адамдар өте көп. Шашын неше түрлі етіп қияды, кірпік жабыстырып, еріндерін ісітеді. Оның бәрі жатырға, балаға кетеді. Одан кейін қандай бала туады? Неге аутизм көп, неге церебралды параличпен туған бала көп?», — деді ол.
Гинекологтың сөзінше, бүгінде емханаларда ауру бала көбейген.
«Дені сау бала тумайды. Барлық себеп осында жатыр. Қыз, келіншектер, бала көтеремін деп жоспарласаңдар, жауапкершілікпен қараңдар. Жатырда жатқан балаға жағдай жасаңдар. Ол бала 9 ай химиясыз өсуі керек. Олар біздің болашығымыз ғой», — дейді Маржан Сағымбекова.
