«Маңғыстаумұнайгазға» ірі көлемде айыппұл салынды, деп хабарлайды kaztoday.kz.
Бас прокуратураның ресми парақшасындағы мәлімет бойынша, «Маңғыстаумұнайгаз» АҚ-ның қызметінде ағынды суларды жер қойнауына жіберу, сондай-ақ тиісті шектеу орнатпай бұрғылау қалдықтарын жинақтаумен байланысты заң бұзушылықтар анықталған.
Прокурорлармен қолданылған шаралардың нәтижесінде, соттың 2024 жылғы 4 желтоқсандағы қаулысымен компания Әкімшілік құқық бұзушылық туралы кодекстің 328-бабымен әкімшілік жауаптылыққа тартылып, 31 млрд. теңге көлемінде айыппұл салынды, делінген хабарламада.
Қазіргі таңда Сот актісі заңды күшіне енді.
Сонымен бірге, аталмыш компаниядағы мұнай жылыту пештерінен қоршаған ортаға ластаушы заттардың шамадан тыс шығарылу дерегі де анықталды. Аталған факт бойынша компания қосымша әкімшілік жауаптылыққа тартылып, 1,2 млрд. теңге айыппұл салынған.
