Бүгін Алматыдағы Тәуелсіздік монументі алдында Желтоқсан оқиғасының қаһармандары мен қала тұрғындары жиналып, гүл шоқтарын қойды. Алаңға шыққан бірнеше Желтоқсан қатысушысының қолында Мемлекет басшысы Қасым-Жомарт Тоқаевтың келесі сөзі жазылған плакат болды:
«1986 жылы өрімдей ұл-қыздарымыз Кеңес Одағының қанағынан қаймықпай, ұлт намысы үшін алаңға шықты. Осы күннен соң тура бес жыл өткенде Тәуелсіздігімізді жариялауымыздың символдық мәні зор. Бұл орайда, азаттықтың алғашқы қарлығаштары – Желтоқсан қаһармандарының азаматтық ерлігі лайықты бағасын алып, жастарға үлгі ретінде насихатталуы керек».
Президент бұл сөзді 2021 жылғы «Тәуелсіздік бәрінен қымбат» мақаласында айтқан еді.
Алаңда жүрген тілшілер плакатты кімнің дайындағанын сұрағанда, желтоқсаншылар өздері жасағандарын айтып: «Тоқаев бізді қолдап отыр» деген пікір білдірген.
Шара соңында Желтоқсан қатысушылары қолдарындағы плакатпен «Атамекен» әнін шырқады.
Сурет: Жәнібек Әмре
