“Жібек Жолы” ҚМҚ қарасты Қызылорда қаласындағы “Ақмешіт Қожа Ахмет Яссауи” қайырымдылық мекемесі жабылды.
Қызылорда қаласының прокуратурасы балалар пансионаты ретінде жұмыс істеген қайырымдылық мекемеге тексеріс жүргізіп, көптеген заңбұзушылықтарды анықтады.
Тексеру жұмыстары барысында «Ақмешіт Қожа Ахмет Яссауи» пансионатында діни әдебиеттер мен діни жазбалары бар дәптерлер табылған. Бұл мекеменің негізгі мақсаттарына қайшы келеді.
“Сондай-ақ, қайырымдылық мекемеде санитарлық, өрт қауіпсіздігі және еңбек нормаларының бұзылғаны белгілі болды. Ұйымның қажетті санитарлық рұқсатнамалары болмаған, балалардың білім алу және медициналық көмек алу құқықтары қамтамасыз етілмеген”, — деп хабарлайды ведомства өкілдері.
Нәтижесінде Қызылорда қаласының прокуратурасының талабымен сот аталған пансионатты тіркеуден шығарып, оның қызметін тоқтатты.
