Маңғыстау облысындағы ұшақ апатынан қаза тапқан қазақстандықтардың жақындарына қаржылай қолдау көрсетіледі.
Бұл туралы апатқа байланысты құрылған үкімет комиссиясының отырысында айтылды. Премьер-министрдің орынбасары Қанат Бозымбаев апаттан зардап шеккендерге қолдау көрсету және қаза тапқандардың үй-ішіне көмек көрсету жөнінде тиісті тапсырмалар жүктеген.
«Бұған қоса, апаттан қайтыс болған шетел азаматтарының Маңғыстау облысына келген жақындарына да қажетті көмек беріледі» деп мәлімдеді облыс әкімдігінің ресми өкілдері.
Ресми дерекке сай, ұшақта экипаждың бес мүшесінен бөлек, Әзербайжанның – 37 азаматы, Ресейдің — 16, Қазақстанның — 6, Қырғызстанның 3 азаматы болған. Өкінішке орай, тірі қалғандар арасында қазақстандықтар жоқ.
