Қызылордада жол апаты болып, жүк көлігінің тіркемесі полицияның қызметтік көлігінің үстіне құлаған, деп хабарлайды kaztoday.kz.
Оқиға «Самара-Шымкент» тас жолының Қызылорда қаласы Талдыарал елді мекенінің тұсында болған.
Қызылорда ОПД ППР екі қызметкері қызметтік автокөлікпен бекітілген аймақтарында қызмет атқару барысында екі автокөліктің соқтығысумен орын алған жол-көлік оқиғасын рәсімдеп жүрген.
Олар көлікке отырған уақытта «Man» жүк көлігінің жүргізушісі басқару жүйесіне ие бола алмай, қарсы бағытта келе жатқан «Газель эвакуаторға» соққан. Сол сәтте жүк көлігінің тіркемесі полицейлердің қызметтік автокөлігінің үстіне құлаған. Онымен бірге «Лексус» автокөлігіне де соққан.
Құдай сақтап, адам аман. Қызылорда облысының Полиция департаменті ұсынған ақпарат бойынша, көліктің жүргізушісі мен жолаушысы және екі полиция қызметкері жарақат алып, ауруханаға жеткізілген.
Бүгінде сотқа дейінгі тергеу жұмыстары жүріп жатыр. Нәтижесі алдағы уақытта белгілі болады.
Полиция департаментінің өкілдері облыс тұрғындарынан жолда абай болуын, жүргізушілерден көлік жылдамдығын шамадан тыс асырмауын сұрайды.
Жылдамдық режимін сақтау, сондай-ақ автомобильдер арасындағы қауіпсіз арақашықтықты, яғни дистанция сақтау және қысқы дөңгелектермен жабдықталу маңызды, бұл жолдағы күтпеген апаттың алдын алуға бірден-бір себепші болады, делінген жазбада.
