Жемқорлардан тәркіленген 1,1 млрд теңгеге спорт кешені салынады, деп хабарлайды kaztoday.kz.
Қайтарылған активтер есебінен Алматы облысында жаңа спорт кешені салынады. Бұл жөнінде Үкіметтің Telegram-дағы ресми арнасында белгілі болды.
Үкімет Алматы облысы Кеген ауданының Жалағаш ауылында спорт кешенін салуға 1,1 млрд теңге бөлді. Жоба «Заңсыз иемденілген активтерді мемлекетке қайтару туралы» Заң шеңберінде іске асырылуда. Президенттің тапсырмасы бойынша Арнаулы мемлекеттік қордағы қаражат өңірлердегі әлеуметтік маңызы бар нысандардың құрылысына бағытталады, делінген жазбада.
Үкімет өкілдерінің ақпаратына сүйенсек, 2024 жылы Қазақстанда барлығы 90 дене шынықтыру-сауықтыру кешені салынған. Олардың басым бөлігі ауылдық жерлерде. Сондай-ақ Үкімет 2025 жылдың соңына дейін спорттық инфрақұрылымға ауқымды түгендеу бағдарламасын іске асыруда: 113 жаңа нысан салу және жұмыс істеп тұрған 26 спорт мекемесін реконструкциялау жоспарланып отыр.
Бүгінгі таңда Үкімет Арнаулы мемлекеттік қордан әлеуметтік маңызы бар нысандарды салуға шамамен 50,6 млрд теңге бөлді. Олардың қатарында 4 мектеп, оның ішінде біреуі музыкалық мектеп, спорт кешені, көпсалалы аурухана кешені, жатақхана, 2 балабақша бар, делінген хабарламада.
