Ұшақта жүрегі ұстап ауырған адамды құтқарған студенттің оқу ақысын облыс әкімі төлеп бермек, деп хабарлайды kaztoday.kz.
Дінмұхаммед Бектұрған Қызылорда-Астана бағытындағы ұшақ бортында жүрегі ұстап, есінен танған адамға алғашқы дәрігерлік көмек көрсетіп, жолаушының өміріне араша түскен.
Оқиға желіде тез таралып, қоғамның ризашылығын тудырды. Кейін Дінмұхаммед Қызылорда облысы, Тасбөгет кентіндегі №11 мектептің түлегі екені белгілі болған. Бүгінде Астана Медицина университетінің ақылы бөлімінде білім алуда.
Бүгін Қызылорда облысының әкімі Нұрлыбек Нәлібаев Дінмұхаммедтің ата анасы Нұрболат және Ғалия Нұрсейітовтермен арнайы жүздесті.
Өңір басшысы Сыр халқының атынан алғыс білдірді.
«Дінмұхамед медициналық көмекке мұқтаж азаматқа дер кезінде алғашқы жәрдем көрсетіп, өмірін сақтап қалды. Оның уақыт оздырмай қабылдаған шешімі, сауатты іс-қимылы өзі сияқты медицина мамандығында білім алатын жастарға үлгі-өнеге болды.Бұл арқылы Дінмұхамед өз мамандығын жақсы меңгергенін ғана емес, ата-анасынан, ұстаздарынан, аға буын әріптестерінен тағылымды тәрбие алғанын көрсетті.Дінмұхамед секілді жас мамандар – еліміздің болашағы. Біз осындай азаматтарға әрдайым қолдау көрсетіп, ерлік ісін өскелең ұрпаққа үлгі етіп насихаттауымыз қажет.Президентіміз тек жастардың ғана емес, өскелең ұрпақты тәрбиелейтін ұстаздардың, қарапайым еңбек адамдарының өнегелі істерін әрдайым көпке үлгі етіп айтып келеді. Өз мамандығын жетік білуге талпынған, үздік оқитын, патриот азаматты тәрбиелеп өсірген сіздерге және ұстаздарға барша Сыр жұртшылығының, өзімнің атымнан зор ризашылығымды білдіремін», – деді Қызылорда облысының әкімі Н.Нәлібаев.
Дінмұхаммед Бектұрған жалпы медицина мамандығының интерні. Көктемде диплом алады. Жоспарда — резидентура оқу. Облыс әкімі Нұрлыбек Нәлібаев Сыр жұртшылығының атынан алғыс ретінде резидентураның оқу ақысын төлеуге қолдау білдіретінін айтты.
