Ақмола облысында ауыл жолдарын жөндеуге бөлінген миллиондаған теңгенің мақсатсыз жұмсалғаны анықталды.
Прокуратура мәліметінше, 2023 жылы Никольское ауылындағы 5,4 шақырым жолды жөндеуге бюджеттен 167,8 миллион теңге қарастырылған. Алайда тексеру кезінде 78 миллион теңгеге жоспарланған жұмыстардың іс жүзінде орындалмағаны белгілі болған.
Қадағалау органы бұл қаражаттың жол жөндеуге қатысы жоқ басқа мақсаттарға жұмсалғанын мәлімдеді.
Аталған дерек бойынша сотқа дейінгі тергеп-тексеру басталды. Күдікке аудандық тұрғын үй-коммуналдық шаруашылық бөлімінің бұрынғы басшысы мен мердігер ұйымның жетекшілері ілінген.
Жол жөндеуге бөлінген қаржының қалай жұмсалғанына тергеу барысында құқықтық баға беріледі.
