Әжесінің 100 мың теңгесін жұмсап жіберген қызға «айыппұл» салынды, деп хабарлайды kaztoday.kz.
Павлодарда 20 жастағы павлодарлық қыз полицияға қоңырау шалып, өзін тонап кеткені туралы хабар берген. Операторлардың сұрағына телефонның арғы жағынан жылап тұрып жауап берген қыз жәбірленушінің образына кірген.
– Менің сөмкемді ұрлап кетті! Ішінде 100 500 теңге және көк түсті Samsung телефоны болған. Автобустан түсіп жатқанымда, артымнан бір ер адам келіп, сөмкемді жұлып алып қашып кетті. Мен оның артынан жүгірдім, бірақ қуып жете алмадым. Ол бірден жоқ болып кетті, – деген телефонның ар жағынан өксігін баса алмаған «жәбірленуші».
Полицияның жедел-тергеу тобы оқиға орнына жедел жетіп, жақын маңдағы көшелерден ақша ұрлап кеткен күдіктіге ұқсайтын адамды іздеген.
Бейнебақылау камераларын қарағанда қыздың мәлімдемелері күдік тудыра бастаған. Себебі, оның айтқан адамы камераға түспеген. Ол өзін тонаған ер адамды аулада көргенін айтқан.
Бұл жағдай тергеушінің күдігін тудырған. Сондай-ақ, қыздың қылмыскердің қашқан бағытын нақты айта алмай, біресе бір жақты, біресе екінші жақты көрсеткені күдігін нақтылай түскен.
«Жәбірленуші» полиция бөліміне жеткізілген соң, күдік расталды. Тергеу кезінде қыз айғақтарынан шатасып, артынша шыдамы таусылып, шындықты айтып берген.
Кейін белгілі болғандай, студентке әжесі несие қарызын төлеу үшін 100 мың теңге берген екен. Алайда қыз қаражатты өз қажетіне жұмсап, жақындары ұрсады деп қорқып, тонау оқиғасын ойдан шығарған.
Арнайы қызметтерді көрінеу жалған шақырғаны үшін қыз әкімшілік жауапкершілікке тартылып, 30 айлық есептік көрсеткіш көлемінде айыппұл салынды.
Мұндай әрекеттер тек полиция жұмысына кедергі келтіріп қана қоймай, шынайы қауіп-қатер туындаған кезде қызмет көрсету уақытын ұзартып, басқа азаматтардың өміріне қауіп төндіруі мүмкін. Жедел қызметтер мен полиция нақты қауіптерге қолжетімді болуы тиіс, деп мәлімдеді Павлодар облысы полиция департаментінің баспасөз қызметі.
