Бүйрегін сатпақ болған ақтөбелік ер адамға қатысты сот үкімі шықты, деп хабарлайды Kaztoday.kz.
Ол несиесін жауып, анасына көмектесу үшін осындай қадамға барған.
2025 жылдың 21 қаңтарында Ақтөбе қаласының қылмыстық істер жөніндегі сотында 1997 жылы туған Ерболат Орынбасаровқа қатысты үкім шығарылды.
Өткен жылдың қыркүйек айында ол Telegram желісінде өз бүйрегін 9 миллион теңгеге сататыны туралы хабарландыру жариялаған. Бұл хабарландыруға полиция қызметкерлері жауап беріп, келіссөз барысында бүйрегін сатушыны ұстаған.
Тергеу мен сот отырысында Орынбасаров кінәсін толық мойындап, өкінетінін айтты. Ол 20 миллион теңге көлеміндегі несиесін жабу үшін және ауыр науқас анасына көмек көрсету үшін осындай әрекетке барғанын түсіндірді.
Сот Ерболат Орынбасаровты шартты түрде бір жылға бас бостандығынан айырды.
