Павлодарда дүкеніне «Обслуживаем только на русском» деп жазған дүкен иесі заң алдында жауапқа тартылды, деп хабарлайды Kaztoday.kz.
Павлодар қаласының әкімшілік құқық бұзушылықтар жөніндегі мамандандырылған соты азаматтың әрекетін ұсақ бұзақылық деп таныған.
Биыл қаңтар айының 16-ы күні азаматша Павлодар қаласы Лермонтов көшесіндегі дүкеннің кіреберіс есігі мен сөресіне “Обслуживаем только на русском” деген жазуды жапсырған.
Сот бұл әрекетті қоғамдық тәртiп пен жеке тұлғалардың тыныштығын бұзатын, айналасындағыларға құрметпен қарамауды бiлдiретiн әрекет деп бағалап отыр.
“Н. кінәсін толық мойындап, өкінді. Ол мұны “Маған “бір фарш” беріңізші” деген өтінішіне сатушының орысша сөйлеуін өтінуімен түсіндірді, бұл оның осы әрекеттерге баруына түрткі болған”, — хабарламада.
Аталмыш дүкен иесі әкімшілік құқықбұзушылық туралы кодекстің 434-бабының 1-бөлігін бұзды деп танылып, 55 048 теңге айыппұл арқалаған.
Сот қаулысы әлі заңды күшіне енбеген.
