Ресей азаматы Алматыда call-орталық ашып, интернет-алаяқтықпен айналысқан, деп хабарлайды Kaztoday.kz.
Аталмыш заң бұзушылық дерегін құзырлы орган өкілдері байланыс операторларымен арада жасалған меморандум шеңберіндегі жұмыс барысында анықтаған.
Алматыдағы ірі бизнес-орталығындағы кеңселердің бірінде Ресей азаматы Call-орталық ашып, оған 24 Қазақстан азаматын жұмысқа алған. Олар әлеуетті клиенттерге қоңырау шалып, криптовалютаға инвестиция салуды ұсынған. Нәтижесінде алданған жұртшылық қолма-қол ақшасын крипто шоттарына аударып, ары қарай байланыса алмай қалған. Алаяқтар жәбірленушілердің телефон қоңырауларына тосқауыл қойған.
Полиция түрлі GSM-шлюздер мен «Sim-Box» пайдалана отырып, интернет арқылы анонимді қоңырау шалуға арналған бағдарламалық қамтамасыз ету орнатылған компьютерлер мен басқа да жабдықтардың 60 бірлігі тәркіледі.
Сондай-ақ, дайын сценарийлері бар дәптерлер табылды. Онда мінез-құлық алгоритмі және клиенттермен қалай жұмыс жасау керек екені көрсетілген (не айту керек, өзін қалай ұстау керек, аға менеджерлерге ауысу және т.б.).
Қазіргі таңда аталған дерек бойынша сотқа дейінгі тергеу басталды.
Прокуратура органдары азаматтарды мұқият болуға, күмәнді инвестициялық салымдар туралы көндіруге берілмеуге, өздерінің банктік карталарының деректері мен кіру кодтарын бөгде адамдарға бермеуге шақырады. Мұндай Call-орталықтың жұмыс істеуі туралы ақпарат болған жағдайда құқық қорғау органдарына хабарласыңыз!
