Полиция қызметкерлері өзін өзі өлтірмек болған ер адамды құтқарды, деп хабарлайды Kaztoday.kz.
1 ақпан күні сағат 10:06 шамасында 102 арнасына қала тұрғынынан шұғыл хабарлама түсті. Алмагүл мөлтек ауданындағы көпқабатты үйдің шатырында оның інісі өз-өзіне қол жұмсамақшы болып тұрғаны туралы ақпарат түскен.
Оқиға орнына дереу жеткен патрульдік полиция қызметкерлері – полиция аға лейтенанты Серік Жолдығалиұлы, полиция аға лейтенанты Нұрсұлтан Жақсыбаев, сондай-ақ учаскелік полиция инспекторлары – полиция лейтенанты Сабырғалиев Бағытжан Бауыржанұлы мен полиция капитаны Сапашев Ерболат Кенжебайұлы жедел әрекет етті.
Кәсіби біліктіліктерінің арқасында полиция қызметкерлері 19 жастағы азаматты шатырдан аман-есен түсіріп алды. Оқиға орнына жедел жәрдем қызметі шақырылып, жас жігітке психологиялық және медициналық көмек көрсетілді.
Қазіргі таңда құқық қорғау органдары жас жігіттің мұндай әрекетке баруына не себеп болғанын анықтауда. Мамандардың айтуынша, мұндай жағдайларда жедел әрекет ету өте маңызды, өйткені уақытылы көрсетілген көмек адам өмірін сақтап қалуға септігін тигізеді.
