Астанада лифтте төбелесіп, пранк жасаған жастар ұсталды, деп хабарлайды Kaztoday.kz.
Астана қаласында тұрғын үйлердің лифтерінде жастар жанжал сахналап, қаруға ұқсас затты көрсетіп, кездейсоқ куәгерлерді қорқытқан. Олардың мұндай әрекеті видеоға түсіп қалған.
Әлеуметтік желілерде таралған бейнероликтердің бірінде азамат Г.А. және оның сыбайласы лифт ішінде өзара жанжалдасқан. Артынша физикалық қақтығысқа ұластырған.
Көрініс барысында Г.А. тапаншаға ұқсас затты шығарып, лифтте тұрған адамдарға бағыттаған.
«Мұндай әрекеттер қайғылы жағдайларға әкелуі мүмкін, оның ішінде адамдардың үрейленуі, денсаулықтарының нашарлауы немесе куәгерлердің агрессивті әрекетке баруы ықтимал», – деп мәлімдеді полиция.
Осы оқиғаға байланысты пранк ұйымдастырушы ұсталып, полиция бөліміне жеткізілді. Оған ұсақ бұзақылық фактісі бойынша әкімшілік іс қозғалып, уақытша ұстау изоляторына қамалды. Іс материалдары сотқа жолданды.
