«Хизб-ут-Тахрир» діни экстремистік ұйымының бейнежазбаларын таратқандар сотталды, деп хабарлайды Kaztoday.kz.
Былтыр қазан айында Жамбыл облысының тұрғыны әлеуметтік желілерде парақшалар ашып, теріс діни бағытта ақпараттар таратқан.
Тelegram әлеуметтік желісінде «Ислам үшін» деген атпен топ ашып, заңсыз террористік құрылым ретінде танылған «Мұсылман бауырлар» және «Өзбекстан-исламдық қозғалысы» халықаралық террористік ұйымдарының бейне жазбаларын жариялаған.
Сондай-ақ, Түркістан облысының тұрғыны желтоқсан айында «WhatsApp» және «Facebook» әлеуметтік желілері арқылы бірнеше рет «Хизб-ут-Тахрир» діни экстремистік ұйымының бейнежазбаларын таратқан.
Мемлекеттік айыптаушылардың сөзінше, сот барысында сотталушылардың кінәсі толық дәлелденген. Осылайша оларға бас бостандығынан айыру жазасын тағайындау сұралған.
Сот шешімі бойынша терроризмді насихаттаған кінәлі тұлғаларға 7 жыл мерзімге бас бостандығынан айыру жазасы тағайындалып, жазаны қылмыстық-атқару жүйесінің қауіпсіздігі барынша жоғары мекемесінде өтеу тағайындалды.
Үкім заңды күшіне енген.
