Астанадағы сот сараптамасы орталығының лауазымды тұлғалары 2 миллиардтан астам теңге ұрлады деп күдікке ілінді, деп хабарлайды Kaztoday.kz.
Астана қаласы бойынша Қаржылық мониторинг агенттігінің департаменті прокуратураның үйлестіруімен Сот сараптамасы орталығының лауазымды тұлғалары мен жеткізуші ТОО басшысына қатысты бюджет қаражатын жымқыру фактісі бойынша сотқа дейінгі тергеуді тіркеді.
«Сот сараптамасы орталығының директоры, мемлекеттік сатып алулар департаментінің басшысы және ТОО басшысы ұсталды. Сот олардың барлығына екі ай мерзімге қамауға алу түріндегі бұлтартпау шарасын белгіледі. Қазіргі уақытта сотқа дейінгі тергеу амалдары жалғасуда», – делінген агенттік таратқан хабарламада.
2023-2025 жылдарға арналған есірткіге тәуелділік пен есірткі бизнесіне қарсы күрес жөніндегі кешенді жоспар аясында сот сараптамасы органдарының материалдық-техникалық базасын жабдықтау үшін республикалық бюджеттен 10,3 миллиард теңге бөлінген.
Алайда, 2023-2024 жылдары Сот сараптамасы орталығының лауазымды тұлғалары жеткізушілермен сөз байласып, бюджетке өтінім беру кезінде жабдықтардың құнын үш есе асырып көрсеткен. Олар мұны жалған коммерциялық ұсыныстар ұсыну арқылы жүзеге асырған, – делінген хабарламада.
Сонымен қатар, мемлекеттік сатып алулар конкурсы жарияланбай тұрып, техникалық сипаттамада тек аффилиирленген компаниялар ғана жеткізе алатын жабдықтар көрсетілгені анықталды.
Қылмыстық жолмен алынған мүлікті тәркілеу мақсатында жалпы құны 148 миллион теңгеден асатын мүлікке тыйым салынды. Олардың ішінде:
- Алматы қаласындағы екі жер телімі,
- Астана қаласындағы пәтер,
- BMW X6 және Toyota RAV4 автокөліктері бар.
Сонымен қатар, ТОО-ның банк шоттарында жатқан 1,6 миллиард теңге, 367 мың АҚШ доллары және 366 мың еуроға да тыйым салынды.
