Алаяқтар тұрғындардың шотынан 48 млн теңге жымқырған, деп хабарлайды kaztoday.kz.
Polisia.kz мәліметінше, Маңғыстау облысы полиция департаменті киберқылмысқа қарсы іс-қимыл басқармасының жедел-іздестіру шаралары нәтижесінде интернет желісі арқылы жасалған екі ауыр санаттағы алаяқтық дерегі анықталған.
Д. есімді азаматтың депозиттік шотынан 28 миллион 430 мың теңге белгісіз тұлғаларға заңсыз аударылған. Астана қаласына қызметтік іс-сапар кезінде үш күдікті қолға түскен. Оның екеуі Ақтау қаласының, біреуі Қарағанды облысының тұрғыны.
Тергеу барысында олардың есеп шоттарына жәбірленушінің ақшасы түскені анықталды. Қылмысты ұйымдастырған Ақтау қаласының тұрғыны ұсталып, уақытша ұстау изоляторына қамалды.
Тағы бір оқиға. А. есімді азаматтың есеп шотынан 20 миллион теңгені белгісіз тұлғалар алған. Жедел-іздестіру іс-шаралары нәтижесінде Өскемен қаласының екі тұрғыны күдікті ретінде ұсталып, уақытша ұстау изоляторына қамалды.
Қазіргі таңда аталған деректер бойынша Қылмыстық кодекстің 190-бабы 4-бөлігіне сәйкес тергеп-тексеру амалдары жүргізілуде.
