Кұлсары қаласындағы емханада ауыр қылмыс жасалды, деп хабарлайды kaztoday.kz.
Alash.kz-нің мәліметінше, бұрынғы күйеуі әйелін аяусыздықпен өлтіріп кеткен.
Қанды оқиға осы жылдың 27 наурызында болған. Күдікті — Шоқпартоғай ауылының тұрғыны, ер адам бұрынғы әйелін пышақтап кеткен. Ол бірден қашып кетуге тырысқан, бірақ Жылыой аудандық полиция бөлімінің қызметкерлері дер кезінде ұстаған.
Бүгінгі таңда аталған дерекке байланысты тергеу шаралары жүргізілуде.
Марқұм болған әйел емханада заңгер болып қызмет атқарған. Түстен кейінгі уақытта жұмыс кабинетінде отырған оған бұрынғы күйеуі келіп, пышақ тыққан.
— Қан мойнынан атқылап жатты, — дейді емхана қызметкері оқиға куәгері.
Жедел жәрдем мен полиция оқиға орнына дереу жеткенімен, дәрігерлер әйелді аман алып қала алмады, қайтыс болды. Артында екі баласы қалды.
Атырау облыстық полиция департаменті оқиға бойынша пікір білдірді:
«Құлсары қаласында орын алған оқиғаға байланысты кісі өлтіру бабы бойынша қылмыстық іс қозғалды. 33 жастағы күдікті ұсталып, қамауға алынды. Тергеу амалдары жүргізілуде. Қазіргі таңда тергеу мүддесіне байланысты қосымша ақпарат жарияланбайды», делінген жазбада.
