Алматыда полиция қызметкеріне шабуыл жасағандар заң алдында жауапқа тартылды, деп хабарлайды Kaztoday.kz.
Оқиға 22 желтоқсан күні Алматы қаласының Медеу ауданындағы «Barland» барында болған.
Кафеге келген қонақтар мен мекеме күзетшілерінің арасында кикілжің шығып, соңы ұрысқа ұласқан. Нәтижесінде сол жерге дереу жеткен полиция қызметкері пышақ жарақатын алған.
Жанжал кезінде күзетшілердің бірі тіркелмеген травматикалық тапаншамен екі рет оқ атқан.
Оның қару алып жүруге және қолдануға рұқсаты болмағаны, сондай-ақ ресми түрде жұмысқа орналаспағаны анықталды — күзет қызметтері бір реттік негізде рәсімделмей қызмет атқарған.
Тергеу жұмыстарының нәтижесінде екі қатысушы да ұсталып, Қылмыстық кодекстің 293-бабы 3-бөлігі (бұзақылық) және 380-бабы 3-бөлігімен (билік өкіліне қатысты күш қолдану) бойынша кінәлі деп танылған.
Сот күзетшіні 5 жылға, екінші қатысушыны 1 жыл 6 айға соттады.
