Діни желеумен адамдарды өлтіруге шақырған Шымкент тұрғыны сотталды, деп хабарлайды Kaztoday.kz.
Қазақстанда терроризм мен діни экстремизмге қарсы күрес аясында бірнеше азамат сотталып, қылмыстық жауапкершілікке тартылды. Бұл туралы Ұлттық қауіпсіздік комитеті (ҰҚК) ресми мәлімет таратты.
2025 жылғы мамырда Шымкент қаласының тұрғыны терроризмді насихаттағаны үшін 7 жылға бас бостандығынан айырылды. Тергеу барысында ол діни желеумен адамдарды өлтіруге ашық шақырып, зорлық-зомбылықты ақтағаны анықталды. Қылмыстық істі ҰҚК тергеген.
Сондай-ақ маусым айында Атырау және Ақтөбе облыстарының соттары діни радикалды идеяларды таратқан тағы екі азаматты соттады. Бірі 7 жыл, екіншісі 6 жыл мерзімге сот үкімімен жазаланды. Тергеу деректеріне сәйкес, бұл тұлғалар бұған дейін де қылмыстық жауапқа тартылған және шетелдегі террористік белсенділік ошақтарына шығуға әрекет еткен.
ҰҚК хабарлауынша, 2025 жылдың алғашқы жартыжылдығында комитет тергеген істер бойынша 52 адам (оның ішінде 2 шетелдік) терроризм және экстремизмге қатысты қылмыстары үшін сотталды. Тағы 52 адамға қатысты тергеу амалдары жалғасуда.
