Қазақстанда әлеуметтік қолдаудың аймақтар арасындағы алшақтығы қоғамда үлкен сұрақ тудырып отыр. Еңбек және халықты әлеуметтік қорғау министрі Светлана Жақыпованың айтуынша, Астанадағы алты балалы отбасы тоқсан сайын 2,7 млн теңге жәрдемақы алса, өңірлерде мұндай отбасыларға бар болғаны 273 мың теңге ғана беріледі.
Президент Қасым-Жомарт Тоқаев бұл теңсіздіктің салдарынан елордаға қоныс аударушылар көбейгенін, ал әлеуметтік шығындар бюджет кірісінен де жылдам өсіп жатқанын атап өтті. Бұл – елде әлеуметтік әділдікті қайта қараудың қажет екенін көрсетеді.
Соңғы жылдары қымбатшылық пен инфляция күшейген шақта көпбалалы отбасылар қолдаудың жеткіліксіздігін жиі айтып келеді. Астанадағы жағдай – әлеуметтік саясаттағы өңірлік теңсіздіктің нақты көрінісі. Сарапшылардың пікірінше, әлеуметтік көмекті барлық аймаққа бірдей ету – уақыт талабы.
