Қармақшы ауданының Ақай ауылындағы дене шынықтыру-сауықтыру кешенінің жұмысына қатысты мәселе әлеуметтік желіде қызу талқыланып жатыр. Жергілікті тұрғын, белсенді Бибігүл Жұмағұлова өзінің жеке Facebook парақшасында https://www.facebook.com/share/p/19p52TKuqb/ аталған кешеннің бүгінгі жағдайына қатысты жазба жариялап, «салтанатты түрде ашылған нысан бүгінде қара құлыпта тұрған жоқ па?» деген сауал тастады.
Жазба астына пікір қалдырған ауыл тұрғындары да өз ойларын ортаға салды. Кейбірі спорт кешенінде үйірмелер тоқтап қалғанын айтса, енді бір бөлігі ғимаратқа басшы тағайындалмағандықтан қараусыз қалғанын алға тартты. Сонымен бірге:
«Ашылу салтанатында әр спорт мектептен жабдықтар тасылды»,
«Балалар қыркүйек басталса да үйірмелерге бара алмай отыр»,
«Спорт кешені халық игілігіне жұмыс істемесе, құрылған қаржының зая кеткені», – деген пікірлер де жазылды.
Аталған сауалдарға қатысты Қармақшы аудандық спорт және туризм бөлімі ресми жауап берді. Мекеме мәліметінше, Ақай ауылындағы спорт кешені жұмыс істеп тұр. Қазіргі таңда онда таеквондо, самбо және қол күресі үйірмелері ұйымдастырылып, жасөспірімдер тұрақты түрде жаттығып жүр. Алдағы уақытта өзге де спорт түрлері ашылатыны хабарланды.
Дегенмен әлеуметтік желідегі пікірлерге қарағанда, тұрғындардың күдігі әлі де сейіле қойған жоқ. Қоғам тарапынан қойылған сауал – жаңа нысанның толыққанды әрі тұрақты түрде жұмыс істеуі.
Жергілікті билік тарапынан нақты іс-шаралар қолға алынса, спорт кешенінің есігі ауыл балаларына айқара ашылып, халықтың сенімі де арта түспек.
