16 қыркүйек 2025 жылы кешкі уақытта Қызылорда қаласында «Ералаш» жеке балабақшасына тиесілі автокөлік қатысқан жол-көлік оқиғасы орын алды. Апат КБИ шағын ауданындағы С. Ысқақов пен Есет батыр көшелерінің қиылысында шамамен сағат 18:08-де болған.
Қызылорда облыстық Полиция департаментінің ресми хабарламасына сәйкес, жол апатына екі көлік қатысқан. Заңға сәйкес оқиға деректері тіркеліп, тиісті құжаттар рәсімделді. Іс ҚР Әкімшілік құқық бұзушылық туралы кодекстің 610-бабының 2-бөлігі бойынша қарастырылуда. Бұл бап – жол қозғалысы ережесін бұзып, өзге көліктерге немесе мүлікке залал келтіру жағдайларын қамтиды.
Ең алаңдатарлық жайт – апат кезінде көліктің ішінде балабақшаның 13 тәрбиеленушісі болған. Абырой болғанда, оқушылардың өміріне тікелей қауіп төнгені жөнінде ақпарат түскен жоқ. Дегенмен, бұл жағдай қала тұрғындары арасында үлкен резонанс тудырды.
Қоғам белсенділері мен ата-аналар балаларды тасымалдау мәселесін қайта қарауды талап етуде. Әсіресе, жүргізушілердің кәсіби дайындық деңгейі мен балабақшаларға қойылатын қауіпсіздік талаптарын күшейту қажеттігі жиі айтылып жатыр.
