AMANAT партиясы қолдауымен Байқоңырда цифрлық жоба бастау алды.

Бүгін AMANAT партиясы Қызылорда облыстық филиалының қолдауымен Байқоңыр қаласы цифрлық білім беру саласын дамытуға бағытталған маңызды кездесу өтті. Жиын барысында өңірдегі IT экожүйесін дамытуға серпін беретін жаңа әріптестік бастамасы жарияланды.
Кездесу аясында партияның «Цифрлық қоғам» жобасы шеңберінде Astana Hub автономды кластерлік қорының Қызылорда қаласындағы филиалы мен Байқоңыр қаласындағы IT-куб цифрлық білім беру орталығы арасында өзара ынтымақтастық туралы меморандумға қол қойылды.
Аталған құжаттың басты мақсаты – білім беру және ғылым салаларындағы өзара байланысты күшейту, заманауи технологиялар бағытында тәжірибе алмасу, сондай-ақ IT саласында білікті, бәсекеге қабілетті мамандар даярлау. Бұл бастама жастардың цифрлық білімге қолжетімділігін арттырып, олардың еңбек нарығындағы сұранысқа ие маман болып қалыптасуына мүмкіндік береді.
Іс-шара барысында партияның облыстық филиалының төрағасы Жандос Базартай сөз сөйлеп, жобаның маңыздылығына кеңінен тоқталды.
Оның айтуынша, қазіргі кезеңде цифрлық трансформация – уақыт талабы. Сондықтан «Цифрлық қоғам» жобасы аясында жүзеге асырылып жатқан мұндай нақты бастамалар жастар үшін жаңа мүмкіндіктерге жол ашады.
– Біз үшін ең маңыздысы – жас ұрпақтың сапалы білім алып, заманауи IT саласында өз орнын табуына жағдай жасау. Бүгінгі меморандум – сол мақсатқа бағытталған жүйелі жұмыстың нақты көрінісі. Байқоңыр қаласында қолға алынған бұл бастама тек құжат жүзінде қалып қоймай, ұзақ мерзімді нәтижеге бағытталған стратегиялық әріптестіктің бастамасы болады. Алдағы уақытта партия тарапынан жастарды қолдау және олардың әлеуетін арттыру бағытындағы жұмыстар жалғасын табады, – деді Жандос Базартай.
Меморандум аясында тараптар білім беру және ғылыми әлеуетті тиімді пайдалану, жаңа буын оқыту стандарттарын енгізу, бірлескен білім беру бағдарламаларын әзірлеу, ғылыми жобаларды іске асыру және оқу үдерісіне инновациялық тәсілдерді енгізу бағытында бірлесіп жұмыс жүргізеді.
Сондай-ақ серіктестік аясында оқушылар мен жастарға арналған IT курстар, цифрлық сауаттылықты арттыру бағдарламалары, шеберлік сабақтары мен тәжірибелік семинарлар ұйымдастыру жоспарланып отыр. Бұл өз кезегінде өңір жастарының технологиялық бағыттағы білімін тереңдетіп, олардың кәсіби дамуына жаңа серпін береді.
Мамандардың пікірінше, мұндай жобалар өңірдегі адами капиталдың сапасын арттырып қана қоймай, инновациялық кәсіпкерліктің дамуына да оң ықпал етеді. Әсіресе Байқоңыр секілді стратегиялық маңызы бар қалада IT саласын дамыту – уақыт талабынан туындаған маңызды қадамдардың бірі.
Алдағы уақытта AMANAT партиясы қолдауымен аталған әріптестік негізінде бірқатар тиімді жобалар жүзеге асырылады деп күтілуде. Бұл бастамалар Қызылорда өңірінің цифрлық әлеуетін арттырып, IT саласының жаңа деңгейге көтерілуіне тың серпін бермек.