AMANAT партиясы бастамаларын қолдау аясында Қызылорда қаласында тас жолдағы велоспорттан 15–16 жас аралығындағы жасөспірім ұлдар арасында республикалық жарыстың салтанатты ашылу рәсімі өтті. Байрақты бәсеке Әлем чемпионы, КСРО-ға еңбек сіңірген спорт шебері Марат Қуанбайұлы Сатыбалдиев жүлдесіне арналды.
Еліміздің түрлі өңірлерінен жиналған жас спортшылардың басын қосқан додаға Қазақстанның тоғыз аймағынан 110 спортшы қатысуда. Бірнеше күнге созылатын жарыста жасөспірімдер өзара шеберлік сынасып, үздіктер анықталады. Мамандардың айтуынша, мұндай республикалық деңгейдегі жарыстар жас спортшылардың тәжірибе жинақтауына, бәсекелік рухын шыңдауына және кәсіби спортқа қадам басуына үлкен мүмкіндік береді.
Салтанатты ашылу рәсімінде сөз сөйлеген ұйымдастырушылар мен құрметті қонақтар бұқаралық спортты дамыту, салауатты өмір салтын насихаттау және жас буынның спортқа қызығушылығын арттыру – мемлекеттік саясаттың басым бағыттарының бірі екенін атап өтті. Әсіресе соңғы жылдары балалар мен жасөспірімдер спортына ерекше көңіл бөлініп, өңірлерде спорт инфрақұрылымын жаңғырту, ауылдық елді мекендерде жаңа спорт нысандарын салу, қолданыстағы кешендерді жаңарту жұмыстары жүйелі түрде жүзеге асырылып келеді.
Сондай-ақ жастардың спортпен тұрақты айналысуына жағдай жасау, дарынды спортшыларды ерте кезеңнен қолдау және халықаралық жарыстарға дайындау бағытындағы жұмыстардың маңызына тоқталды. Бұл ретте велоспорт секілді төзімділік пен жоғары дайындықты талап ететін спорт түрлерін дамыту – ел спортының әлеуетін арттыруға ықпал ететіні айтылды.
Қызылорда төрінде өтіп жатқан жарыс – тек жеңімпаздарды анықтайтын дода ғана емес, жас спортшылардың өзара тәжірибе алмасып, жаңа белестерге ұмтылуына жол ашатын маңызды алаң. Осындай бәсекелерден болашақ чемпиондар өсіп шығатыны сөзсіз.
Жарысқа қатысушы барлық спортшыларға сәттілік пен жарқын жеңістер тілейміз.
