Шымкент қаласында сүт өндірумен айналысатын шаруа қожалықтарының қызметіне жүргізілген ауқымды тексеру аяқталды. Тексеру жұмыстары прокуратураның үйлестіруімен жүргізіліп, оған Ұлттық қауіпсіздік комитеті департаменті мен қалалық Ішкі мемлекеттік аудит департаментінің мамандары қатысты.
Аудит барысында мемлекеттен ауыл шаруашылығы өндірісін дамыту мақсатында субсидия алған 12 компанияның сүт өндірісі көлемі мен ірі қара мал саны туралы мәліметтерді шындыққа сәйкес келмейтін түрде көрсеткені анықталған.
Алдын ала мәліметтерге сәйкес, аталған кәсіпорындар өндірілген сүт көлемін жасанды түрде арттырып көрсетіп, субсидия алу үшін есептік көрсеткіштерді бұрмалаған. Соның салдарынан мемлекетке келтірілген залал көлемі 5 миллиард теңгеге бағаланып отыр.
Қазіргі уақытта жиналған материалдар құзырлы органдардың қарауына жолданып, процессуалдық шешім қабылдау мәселесі қаралуда. Егер заң бұзушылық фактілері толық дәлелденсе, кінәлі тұлғаларға қатысты қылмыстық іс қозғалуы мүмкін.
Құзырлы органдар тергеу нәтижелері бойынша қосымша ақпарат берілетінін мәлімдеді.
