Ресейдің Жоғарғы соты жүргізушілерге қатысты маңызды құқықтық түсініктеме берді. Енді жүргізуші көлікті тоқтатып, одан шығып кеткен болса да, полицияның медициналық куәландырудан өту туралы заңды талабынан бас тартса, жүргізуші куәлігінен айырылуы мүмкін.
Мұндай шешім Краснояр өлкесіндегі оқиғаға байланысты қабылданды. Жүргізуші жұмыс орнына өз көлігімен келіп, автокөлігін тұраққа қойғаннан кейін ғимаратқа кірген. Басшылық оның алкоголь иісін сезіп, полиция қызметкерлерін шақырған. Полицейлер медициналық куәландырудан өтуді талап еткенімен, жүргізуші одан үзілді-кесілді бас тартқан.
Сот оның көлікті тастап кеткенін және сол сәтте жүргізуші болып саналмайтынын алға тартқан уәждерін қабылдамады. Нәтижесінде оған айыппұл салынып, жүргізуші куәлігінен айыру туралы шешім күшінде қалдырылды.
Жоғарғы соттың түсіндіруінше, егер адамның көлікті басқарған кезде мас күйінде болғанына немесе масаңдық белгілері сол уақытта байқалғанына негіз болса, полиция қызметкерлері оны медициналық тексеруден өткізуді талап ете алады. Ал бұл талаптан бас тартудың өзі әкімшілік құқық бұзушылық болып саналады.
Осылайша, көлікті жүргізіп келген адам автокөліктен шығып кеткеннен кейін де медициналық куәландырудан бас тартса, жүргізуші куәлігінен айырылу қаупі сақталады.
