Қазақстанда әлеуметтік желіде қаралым мен донат жинау үшін әдепсіз және қауіпті контент таратқан тоғыз стример жауапкершілікке тартылды. Бұл туралы Ішкі істер министрлігі хабарлады.
Ведомство мәліметінше, құқық бұзушылар тікелей эфир кезінде балағат сөздер айтып, өзге адамдарды қорлаған, сондай-ақ көрермен назарын аудару мақсатында қауіпті пранктер ұйымдастырған.
Астана мен Жамбыл облысында тікелей эфирде былапыт сөздер қолданған екі әйелге айыппұл салынды. Ал Алматы тұрғыны өзге адамдарды қорлағаны үшін бес тәулікке әкімшілік қамауға алынды.
Шымкентте 20 жастағы жігіт әлеуметтік желі қолданушыларының назарын аудару үшін электрошокер пайдаланып, адам ұрлау көрінісін ұйымдастырған. Жалған қойылым үшін ол сегіз тәулікке қамауға алынды.
Жамбыл облысында да хайп қуған жастар жауапкершіліктен құтылмады. Тікелей эфир барысында бір-біріне дене жарақатын салған жігіт пен бойжеткеннің әрекетіне құқықтық баға беріліп, олар жауапқа тартылды.
ІІМ әлеуметтік желідегі танымалдық пен жоғары қаралым заң талаптарын бұзуға себеп бола алмайтынын ескертті.
Ведомство интернет кеңістігінде құқық бұзушылық жасаған азаматтар анықталып, заңнамаға сәйкес жауапкершілікке тартылатынын мәлімдеді.
