Астанада жедел жәрдем көліктерін жөндеуге бөлінген бюджет қаражатын жымқырған бұрынғы басшылар сотталды.
Бас прокуратураның мәліметінше, 2020–2023 жылдары жедел жәрдем станциясының экс-директоры, көлік бөлімінің бұрынғы басшысы және бас механик санитарлық автокөліктерді жөндеу мен техникалық қызмет көрсетуге бөлінген қаражатты жымқырған. Мемлекетке келтірілген залал 700 млн теңгеден асқан.
Соның салдарынан қызметтегі жедел жәрдем көліктерінің саны 149-дан 32-ге дейін қысқарған.
Қазіргі уақытта 440 млн теңгеден астам шығын өтелген. Такси қызметіне жұмсалған тағы 300 млн теңге сот тәртібімен өндірілуге тиіс.
Сот кінәлілерді 8 және 9 жылға бас бостандығынан айырды. Сондай-ақ олар мемлекеттік және квазимемлекеттік секторда лауазым атқару құқығынан өмір бойына айырылды.
