Сәбидің жөргегінен алтын, жасөспірімнің киімінен 40 мың доллар табылды

Ташкент облысындағы «Навои» шекаралық кеден бекетінде заңсыз алтын мен шетел валютасын алып өтпек болған екі дерек анықталды. Кеден қызметінің мәліметінше, күдіктілер құнды заттарды жасыру үшін балаларды пайдаланған.
Бірінші жағдайда елден шығуға әрекеттенген әйелдің сәбиінің жөргегінен жалпы салмағы 200 грамм болатын екі алтын құймасы табылды. Сонымен қатар оның жанынан 70 грамм алтын әшекей бұйымдары анықталған. Тәркіленген алтынның жалпы құны шамамен 450 миллион сумға (37,6 мың АҚШ доллары) бағаланған.
Екінші жағдайда шетел азаматы 40 мың АҚШ долларын 14 жастағы қызының киімінің астына жасырып, шекарадан алып өтпек болған. Алайда кеден қызметкерлері заңсыз әрекеттің жолын кескен.
Кеден органдарының еске салуынша, қолданыстағы талаптарға сәйкес, декларациялау тәртібін сақтай отырып, 100 миллион сумға дейінгі қолма-қол валютаны елден алып шығуға рұқсат етіледі.
Сондай-ақ кәмелетке толмағандарды құқық бұзушылыққа тарту жауапкершілікті ауырлататын мән-жай болып саналады. Мұндай әрекет үшін 10-нан 30 базалық есептік мөлшерге дейін айыппұл қарастырылған.
Қазіргі уақытта аталған фактілер бойынша тергеу амалдары жүргізілуде.