Алматыда ерлі-зайыптылар арасындағы жол үстіндегі жанжал қайғылы жағдаймен аяқталды. Салдарынан оқиғаға еш қатысы жоқ жаяу жүргінші қаза тапты.
5 қараша күні Ангар көшесінде Changan X5 пен Chery Arrizo автокөліктері соқтығысқан. Алдын ала мәлімет бойынша, көлік тізгінінде отырған ерлі-зайыптылар арасында жанжал туындаған.
Қатты соққыдан Chery Arrizo жолдан шығып, тротуардағы бағаналарға соғылған. Осы сәтте сол маңнан өтіп бара жатқан ер адамды көлік қағып, бірнеше ондаған метрге ұшырып жіберген.
Оқиға орнына жеткен жедел жәрдем қызметкерлері жаяу жүргіншінің қайтыс болғанын анықтады.
Екі адамның арасындағы бір сәттік ашу мен жол үстіндегі жанжал жазықсыз жанның өмірін қиды.
