Кейінгі уақытта картоптың келісі 450 теңгеге дейін қымбаттағаны белгілі. Сауда министрлігінің өкілі бұған Ресейдегі жағдай мен экспорттың себеп болғанын алға тартуда, деп хабарлайды Kaztoday.kz.
Сауда және интеграция министрлігінің сауда комитеті төрағасының орынбасары Ернұр Жәутікбаевтың сөзінше, өткен жылдары сыртқа шамамен 400 мың тонна картоп экспортталған. Ал биыл бұл көрсеткіш 600 мың тоннаға дейін жеткен. Десе де, Е.Жәутікбаев барлық желіде картоп жеткілікті екенін айтып отыр.
– Бүгінгі таңда картоп барлық желіде бар. Біз картоптың болуын үнемі бақылап отырмыз. Қазіргі жағдайға Ресейде картоп өндірісінің көлемі 15%-ға азаюы себеп болып отыр. Сонымен қатар, картоп экспортының көп болуына байланысты біз Қырғызстаннан импорттадық, бірақ Қырғызстан өз экспортының басым бөлігін Өзбекстанға бағыттап отыр, өйткені ол жақта сұраныс жоғары. Бірақ сіздер мынаны түсінулеріңіз: ауыл шаруашылығы өндірушілері картоп өсіріп, тәуекел жасап жатады, олар да табыс табуы тиіс, сондықтан экспорттайды. Біз бұл жағдайды реттеу бойынша жұмыс жүргізіп жатырмыз. Павлодар және Қарағанды облыстарында біздің жергілікті әкімдіктер тауар өндірушілермен бағаны өсірмеу бойынша жұмыс жүргізіп жатыр, – деп түсіндірді Е. Жәутікбаев.
