Ақтауда 31 қаңтар күні тренер Алина Серикованың өліміне қатысты апелляциялық сот үкімі шықты, деп хабарлайды Kaztoday.kz Маңғыстау облыстық сотына сілтеме жасап.
Ол бірнеше сағат бойы бес ер адамның азаптауынан кейін қаза тапқан.
Марқұм қыздың ата-анасы алғаш рет сот залына қатысуға рұқсат алды.
Апелляциялық сот басты айыпталушыны өмір бойына бас бостандығынан айырды. Бұған дейін бірінші инстанция соты оған 20 жыл жаза тағайындаған еді. Тағы бір сотталушы 16 жылға, ал қалғандары 13 жыл 6 айға және 13 жылға бас бостандығынан айырылды. Бірінші инстанция соты оларды 8,5 жылға бас бостандығынан айырған болатын.
Сотталушылардан жәбірленуші тарапқа 19 618 415 теңге көлемінде материалдық шығын және 30 миллион теңге көлемінде моральдық өтемақы өндірілді.
Еске сала кетейік, бұған дейін апелляциялық соттың екі отырысы өтпей қалған еді: алғашқысы айыпталушының адвокаты келмегендіктен, ал екіншісі айыпталушының қорғаушысынан бас тартуына байланысты кейінге шегерілген.
Бұған дейін Бауыржан Жолжан Tengrinews.kz редакциясына қылмыс орнынан түсірілген суреттерді ұсынған және апелляциялық соттан күткен үміттерімен бөліскен.
Алина Серикова 2023 жылдың мамыр айында суицид жасады. Қайғылы оқиғадан бірнеше күн бұрын ол сұмдық қылмыстың құрбаны болды. Бейтаныс ер адамдар мефедрон есірткісінің әсерімен оған шабуыл жасап, ұрлап, ұрып-соғып, зорлап, кейін екі миллион теңге несие алуға мәжбүрлеген.
Марқұмның ағасы Tengrinews.kz редакциясына қарындасының ұрланған сәтін түсірген бейнежазбаны ұсынды.
Кадрларда бірнеше ер адамның қызды көлікке күштеп апара жатқаны көрінеді. Ол бар күшімен қарсылық көрсеткенімен, екінші көлік келіп, ішінен шыққан жігіт басқаларға көмектесіп, қызды көлікке күштеп отырғызған. Кейін екі көлік бірден қашып кеткен.
2024 жылдың желтоқсанында қылмыскерлер сот алдында жауап берді. Прокурор басты айыпталушыны өмір бойына бас бостандығынан айыруды, ал қалған қатысушыларға 15-16 жыл жаза тағайындауды сұрады. Алайда сот шешімімен басты айыпталушы 20 жылға, ал оның төрт сыбайласы 7 жылдан 8,5 жылға дейін бас бостандығынан айырылды.
Марқұмның отбасы мен прокурорлар бұл үкімнің тым жеңіл екенін мәлімдеді. Маңғыстау облыстық прокуратурасы сот үкіміне апелляциялық шағым түсіріп, айыпталушыларға жазаны қатаңдатуды талап етті.
Фото: Lada.kz
