Астанада тұрғынның ақшасы мен көлігін тонаған қылмыстық топ қолға түсті, деп хабарлайды Kaztoday.kz.
Ұйымдасқан қылмыстық топты Астана қаласы полиция департаментінің ұйымдасқан қылмысқа қарсы күрес басқармасы қолға түсірген.
Қылмыстық топ құрамында бұған дейін де бірнеше рет сотталған адамдар бар.
ІІМ ұйымдасқан қылмысқа қарсы күрес департаментінің өкілі Қуандық Алпыстың сөзінше, ұсталғандар жергілікті тұрғынды қорқытып, зорлық-зомбылық көрсетіп 5 млн теңге ақшасын және Тоуота маркалы жол талғамайтын көлігін тартып алған.
Сондай-ақ, банктердің бірінің іргелес аумағында олар 6 млн теңгені ашық түрде тонап кеткен.
Қылмыстық топтың барлық қатысушылары қамауға алынды. Олардың басқа да осыған ұқсас қылмыстық құқық бұзушылықтарға қатыстылығын тексеру жүзеге асырылуда. Сотқа дейінгі тергеп-тексеру алдын ала сөз байласу арқылы адамдар тобы жасаған бопсалау және тонау фактілері бойынша жүргізілуде, — деді ІІМ ұйымдасқан қылмысқа қарсы күрес департаментінің өкілі Қуандық Алпыс.
