«Қазақмыс» корпорациясының лауазымды тұлғалары ұрлық ісі бойынша ұсталды, деп хабарлайды Kaztoday.kz.
Ішкі істер министрлігінің баспасөз қызметінің мәліметінше, «Қазақмыс» корпорациясының лауазымды тұлғаларына қатысты ұрлық дерегі бойынша тергеу жүргізілуде.
«Ішкі істер министрлігі өнеркәсіп нысандарында қылмыстық ұрлық схемаларын анықтау және жолын кесу бойынша жүйелі жұмысты жалғастыруда. (…) Ұлытау облысында Ұйымдасқан қылмысқа қарсы күрес басқармасы (ҰҚҚБ) мен «Қазақмыс» корпорациясының қауіпсіздік қызметі бірлесіп, кәсіпорын қызметкерлерінен құралған екі қылмыстық топты ұстады. Олар тауар-материалдық құндылықтарды ұрлау схемасын ұйымдастырған», – делінген хабарламада.
Қазіргі уақытта сотқа дейінгі тергеу жұмыстары қылмыстық топтардың алдын ала келісім арқылы жасаған ұрлықтары бойынша жүргізіліп жатыр.
«Бірінші топқа кәсіпорынның учаске бастығы жетекшілік еткен. Олар кәсіпорын мүлкін 16 миллион теңгеден астам сомаға ұрлаған. Екінші топта қылмысқа корпорацияның бір басқармасының басшысы қатысқан. Олар жалған құжаттар жасап, ұрланған мүлікті кәсіпорын аумағынан шығарған. Тергеушілер бұл қылмыстық әрекеттерге айқын дәлелдер жинап, барлық күдіктілерді қамауға алды», – деп хабарлады ІІМ Ұйымдасқан қылмысқа қарсы күрес департаментінің өкілі Қуандық Алпыс.
Сонымен қатар, Павлодар облысы полиция департаментінің ҰҚҚБ қызметкерлері Алюминий зауыты аумағынан металл ұрлау схемасын анықтады.
«Қылмысқа кәсіпорынның өз қызметкерлері қатысқан. Олардың заңсыз әрекеттері жедел іздестіру шаралары барысында құжатталды. Күдіктілер металлдың кезекті партиясын алып шығуға әрекет жасаған кезде қолма-қол ұсталды. Қылмыстық топтың әрекеттерінен кәсіпорынға 30 миллион теңге көлемінде зиян келтірілген. Қазіргі таңда бірнеше эпизод бойынша қылмыстық іс тергелуде», – деп мәлімдеді ІІМ өкілдері.
Сондай-ақ, 2023 жылы «Qarmet» АҚ-ның мүлкін ұрлау ісі бойынша ұсталған ұйымдасқан қылмыстық топтың жетекшісі мен мүшелері ұзақ мерзімге бас бостандығынан айыру жазасына кесілді.
«Аталған кәсіпорында ұрлыққа қатысы бар тағы екі ұйымдасқан қылмыстық топтың тергеуі аяқталып, қылмыстық істер сотқа жолданды. Ірі өнеркәсіп нысандарындағы қылмыстық топтардың заңсыз әрекеттерін тоқтату жұмыстары Ішкі істер министрлігінің тұрақты бақылауында», – деп атап өтті Қуандық Алпыс.
