Қазалы ауданында қыркүйектің екінші жексенбісінде тойланатын Отбасы күніне орай «Мерейлі отбасы – 2025» ұлттық байқауының аудандық кезеңі мәресіне жетті. Сайыстың жеңімпаздары салтанатты түрде марапатталып, елге үлгі болар шаңырақтар көпшілікке таныстырылды.
Мерейлі шараға аудан әкімінің міндетін атқарушы Жалғас Сүйеубаев қатысып, отбасылық құндылықтарды дәріптеп жүрген әулеттерге құрмет көрсетті.
– Бұл байқау елімізде 2014 жылдан бері үзбей өткізіліп келеді. Мақсаты – отбасының қоғамдағы орнын айшықтап, береке-бірлікті дәріптеу. Биыл Қазалы ауданынан 24 отбасы қатысуға ниет білдірді. Өткен жылдары біздің ауданнан шыққан Смағұловтар әулеті облыстық кезеңде жеңімпаз атанып, республикадағы үздік жиырма әулеттің қатарынан көрінгені баршаға белгілі. Мұндай өнегелі шаңырақтар – жас ұрпаққа берік тәрбие мен асыл құндылықты аманаттап отырған мақтанышымыз, – деді ол өз құттықтауында.
Сайысқа қатысқан отбасыларға «Берекелі отбасы», «Өнерлі отбасы», «Бақытты отбасы», «Зияткер отбасы» сынды арнайы номинациялар беріліп, естелік сыйлықтар табысталды.
Биылғы байқаудың бас жүлдесі Әйтеке би кентінің Құмарбаевтар отбасына бұйырды. І орынды – Балтөреевтер әулеті (Өркендеу ауылы), ІІ орынды – Бердалиевтер отбасы (Майдакөл ауылы), ІІІ орынды – Жақсылықовтар әулеті (Жанқожа ауылы) иеленді. Бас жүлде мен бірінші орын иегерлері облыстық кезеңге жолдама алып, Қызылорда қаласында өтетін сайыста бақ сынайтын болды.
Салтанатты марапаттау рәсімі аудан өнерпаздарының мерекелік концертімен жалғасып, ән мен күйден шашу шашылды. Көпшілік шат-шадыман көңіл-күйде тарқасты.
Қазалы өңірінде отбасы институтын нығайту бағытында жүйелі жұмыстар жүргізіліп келеді. Көпбалалы жанұяларға мемлекет тарапынан жәрдемақы төлемдері өсіп, ана мен балаға көрсетілетін әлеуметтік қолдау көлемі артуда. Бүгінде ауданда 694 «Алтын алқа» иегері, 1152 «Күміс алқа» иегері және 3,5 мыңнан аса көпбалалы отбасы бар.
